भारतले एआई पूर्वाधारमा एक अर्ब २० करोड डलर लगानी गर्ने

नयाँदिल्ली । भारतले एआई पूर्वाधार स्टार्टअपमा एक अर्ब २० करोड अमेरिकी डलर लगानी गर्नेभएको छ । भारतको सूचना प्रविधि मन्त्रालयले जारी गरेको विज्ञप्तिमा सो रकम कम्प्युटिङक पूर्वाधार स्थापना गर्न र एआई स्टार्टअपसम्बन्धी परियोजनामा खर्च हुने उल्लेख छ ।

कनिष्ठमन्त्री राजीव चन्द्रशेखरले लगानीले भारतको एआई इकोसिस्टम प्रणालीलाई उत्प्रेरित गर्ने र विश्वका लागि एआईको भविष्यको आकार दिने शक्तिका भारत स्थापित हुने बताएका छन् ।

भारतमा गरिएको एक पूर्वानुमानअनुसार भारतको एआई बजार सन् २०२७ सम्म १७ अर्ब अमेरिकी डलरबराबर पुग्नेछ । यो आँकडाले एआई सफ्टवेयरका लागि वैश्विक बजारको एउटा सानो अंश देखाउँछ । अमेरिकी शोध फर्म गार्टनरले भने सन् २०२७ सम्म एआई बजार दुई खर्ब ९७ अर्ब डलरसम्म पुग्ने अनुमान गरेकोक छ ।

परम्परागत कल सेन्टर वा कोडिङ भूमिकामा काम गर्ने इन्जिनियरिङ स्नातकहरूले एआई मोडेलबाट आफ्नो नोकरीलाई खतराका रूपमा लिइरहेका छन् ।

ओपनएआईका प्रमुख कार्यकारी साम अल्टम्यानले गत वर्ष नयाँदिल्लीमा श्रोताहरूलाई भारतीय उद्यमी तथा कम्पनीहरूले महत्वपूर्ण वित्तीय सहयोगविना एआई उत्पादन बनाउनका लागि संघर्ष गर्नुपर्ने बताएका थिए ।

भारतका अर्बपति धनाड्य टाइकुन मुकेश अम्बानीको रिलायन्स इन्डस्ट्रिज र मुलुकका शीर्ष विश्वविद्यालयहरूबीचको साझेदारीमा यसै महिना च्याटजिपिटी–स्टाइलको एआई च्याटबट एप्लिकेसन सुरु हुने बताइएको छ ।