पानी कम्पनीको ट्याङ्की पड्किदा एक मजदुर घाइते

धनगढी। कैलालीको लम्कीचुहा नगरपालिका–३ बल्चौरमा रहेको चिसापानी मिनिरल वाटर कम्पनी प्रालिको एयर कम्प्रेसर ट्याङ्की पड्किदा एक जना मजदुर घाइते भएका छन् । 
सोही कम्पनीमा कार्यरत भारतको दिल्ली बागवत जिल्ला पूर्वदेव ग्राम पञ्चायत घर भएका २६ वर्षीय पंकज शर्मा घाइते भएका हुन । कम्पनीमा काम चलिरहेको बेला अचानक ट्याङ्की पड्किदा उनको टाउको, निधारमा चोट लागेको छ । अवस्था मध्यम रहेको प्रहरीले जनाएको छ ।

लालरत्न अस्पतालमा उनको प्रारम्भिक उपचारपछि थप उपचारका लागि कोहलपुर लगिएको जिल्ला प्रहरी कार्यालयका प्रवक्ता प्रहरी नायब उपरीक्षक वेदप्रकाश जोशीले जानकारी दिए । उनका अनुसार ट्याङ्की पड्किदा कम्पनीको फिल्टर मेसिन, बल्लोइङ्ग मेसिन, पानी ट्याङ्क फिल्टर कन्भेटर बेल्ट, टिनको छानामा क्षति भएको छ । ट्याङ्की पड्किएपछि सञ्चालक दीपक शाहीले इलाका प्रहरी कार्यालय चिसापानीलाई जानकारी गराएका थिए ।