अमेरिकी डलरको भाउ सस्तियो, नेपाली रुपैयाँको क्रयशक्ति बढ्यो

अर्थ समाचार

अमेरिकी डलरको भाउ सस्तियो, नेपाली रुपैयाँको क्रयशक्ति बढ्यो
काठमान्डौं । मंगलबार अमेरिकी डलरको भाउ सस्तिएको छ । नेपाल राष्ट्र बैंकले अमेरिकी डलरको खरिद दर १ सय ९ रुपैयाँ ३५ पैसा र विक्री दर १ सय ९ रुपैयाँ ९५ पैसा तोकेको छ । असोज यता नेपाली बजारमा डलरको भाउमा निरन्तर गिरावट आइरहेको छ । यसले गर्दा नेपाली रुपैयाँ मजबुत हुँदै गएको छ ।

नेपाली बजारमा असोज २४ गते डलरको भाउ सार्वधिक महँगो १ सय १९ रुपैयाँ ३३ पैसा पुगेको थियो। डलरको भाउ घट्नु भनेको नेपाली रुपैयाँ भन्दा डलर कमजोर भएको हो । डलर कमजोर हुँदा विदेशमा काम गर्ने नेपालीले पठाउने रेमिटेन्सको भुक्तानी कम हुन्छ । यसले गर्दा रेमिट्यान्समा कमि आउन सक्छ । तर अर्कोतर्फ मुलुकको आयातको भार कम पर्न जान्छ । नेपाली रुपैयाँको क्रयशक्ति बलियो हुने भएकाले मुद्रास्फीति कम भएर जान्छ । यसको अर्थ उपभोक्ता मूल्य कम भएर जानु हो ।

डलरको भाउ घट्दा विदेशबाट ऋण लिएर लगानी गर्न चाहनेहरुका लागि अवसर हुन्छ । एकमहिना अघि अमेरिकी राष्ट्रपति डोनाल्ड ट्रम्पले ब्याजदर नबढाउन फेडलाई दबाब दिएपछि फेडले ब्याजदर नबढाउने भएको छ । त्यसैले गर्दा अमेरिकी डलरको माग अन्तर्राष्ट्रिय बजारमै घट्दै गएको हो । जसको असर डलरको मूल्यमा परिरहेको छ ।

तर नेपालमा भारतीय रुपैयाँसंग नेपाली रुपैयाँको स्थिर विनिमयदर छ । त्यसैले पनि भारतीय रुपैयाँ कुनैपनि बेला कमजोर बन्न गएमा नेपाली रुपैयाँ पनि कमजोर बन्न सक्छ ।

डलर कमजोर हुँदा पर्ने प्रभाव 
रेमिट्यान्स कम आउँछ । 
आयातमा गर्नुपर्ने भुक्तानी रकम कम हुन जाँदा व्यापार घाटा कम हुन्छ ।
पर्यटन क्षेत्रमा आम्दानी घटेर जान्छ ।
निर्यात व्यापारीको आम्दानी घट्छ। 
विदेशबाट कच्चा पदार्थ ल्याएर उत्पादन गर्ने उद्योगको लागतमा कमहुन जान्छ । जसले उपभोग्य वस्तु्को मूल्य घटाउँछ । 
सरकारलाई विदेशी ऋण र साँवा भुक्तानीमा सहज हुन्छ । बैंकिङ खबर 
विदेशमा पढन जाने विद्यार्थीलाई, औषधि उपचारमा जानेहरुलाई, विदेश भ्रमणमा जानेहरुलाई फाइदा पुग्छ ।