श्रीमान् गुमाएकी गोमा अस्पतालमा छट्पटाउँदै, छोराद्वारा सहयोगको अपिल

द्वन्द्वमा

हिमाल जोशी 

द्वन्द्वमा श्रीमान गुमाएकी गोमाको उपचारका लागि संकलित रकम हस्तान्तरण गर्दै महिलाहरु। 
धनगढी – २०५८ सालमा तत्कालिन माओवादीले अछाम आक्रमण गर्दा मृत्यु भएका प्रहरी जवान नृप बहादुर बोहोराकी श्रीमती गोमादेवी बोहोरा अहिले अस्पतालमा उपचारमा रहेकी छन् । उनका दुवै मृगौला शुकेर काठमाडौँ स्थित राष्ट्रिय मृगौला उपचार केन्द्रमा उपचार भइरहेको छ ।

बोहोरा २०७४ फागुन देखि अस्पताल भर्ना भएकी हुन् । लामो समयदेखि अस्पताल भर्ना भएकी उनको अहिले सम्म झण्डै नौ लाख खर्च भइसकेको छ । उनका छोरा सुवास बोहोराले भने–‘अहिले सम्म त जेनतेन खर्च बेहो¥यौँ, अब अस्पतालले थप १५ लाख जति चाहिने भनेको छ, पैसा नभएर खोज्दै छौँ ।’

प्रहरी जवान नृप बोहोराको मृत्यु पछि उनको परिवारमा श्रीमती, एक छोरा र छोरी मात्र रहेका छन् । पुख्र्यौली घर अछाम रहेका बोहोरा परिवार घरका मुख्य अभिभावकको मृत्यु पछि कैलालीको धनगढी उपमहानगरपालिका १ शिवनगरमा बस्दै आएका छन् ।

मृतकका छोरा सुवासले भने–‘घरमा कमाउने कोही छैन, आमा पनि लामो समयदेखि बिरामी भएर थला परेपछि घरमा निकै समस्या भएको छ ।’ सरकारका विभिन्न निकायमा आमाको उपचार सहयोगका लागि आग्रह गरिएको भएपनि अहिले सम्म कतैबाट सहयोग नपाएको नृपले दुखेसो गरे ।

‘आमाको काठमाडौँमा उपचार शुरु भएपछि यस बिचमा कुवेतबाट रमेश विक र एक जना अर्का दाईले १५ हजार सहयोग गरे, यसवाहेक कसैले कतैबाट सहयोग गरेको छैन ।’ अझै पनि विभिन्न सरकारी निकायमा उपचार सहयोगका लागि आग्रह गरिरहेको नृपले बताए ।

आइतबार धनगढी नगरपालिका १ शिवनगर स्थित शिव महिला समूहले समूहमा आबद्ध महिलाहरुबाट रकम संकलन गरि गोमादेबी वोहोराको उपचारका लागि २१ हजार ५ सय ५ रुपैयाँ उनका छोरा नृपलाई हस्तान्तरण गरेका छन् । महिला समूहकी अध्यक्ष लिला भण्डारीले भनिन्–‘आर्थिक अभावमा उपचारको पर्खाईमा रहेकी महिलालाई सहयोग गर्न पाउँदा खुशी लागेको छ ।’

उनले गोमाको समस्या थाहा पाएपछि समूहका सदस्यहरुसँग सल्लाह गरि आर्थिक संकलन गरि हस्तान्तरण गरेको बताईन । यस्तै धनगढी १ केदार टोलमा रहेको प्रगति गरिबी निवारण महिला कोषबाट पनि बोहोरालाई ५ हजार सहयोग गरिएको छ । आइतबार कोषकी अध्यक्ष पुष्पा चौधरीले गोमाका छोरा सुवासलाई उक्त रकम हस्तान्तरण गरिन् ।

यी दुवै समूहले सहयोग गरेपछि गोमाका छोरा सुवासले आफ्नो आमाको उपचारका लागि थोरै भएपनि राहत हुने बताए । उनले सहयोगका लागि सबैलाई अपिल समेत गरेका छन् । देश सञ्चार