बिहिबार ०६, मङि्सर २०८१ ०१:०४
सरकारले घर भत्काउन थालेपछि घरधनीले दिए सबै घर भत्काएर देखाउन चेतावनी
पाल्पा । नियम विपरित तला थपेको भन्दै तानसेन नगरपालिकाले वडा २ महेन्द्रवोधी विद्यालयको गेट अगाडिको थमकला अर्यालको तेस्रो तलाको केही भाग नगरपालिकाले भत्काएको छ ।
विना ईजाजत, विना स्विकृति नक्सा पास विना घरको तेस्रो तला थपेको भन्दै अर्यालको तलाको केही भाग तानसेन नगरपालिकाले भत्काएको हो । घर भत्काउने समयमा दुवै पक्ष बीच भनाभन भएपछि नगरपालिकामा भएको सहमतिमा घरधनी अर्यालले आफै घर भत्काउने सहमति गरेकी छिन् ।
ईजाजत विना तला नथप्न पत्राचार गर्दा समेत अटेर गरेको, नगरपालिकाको ऐन नियम विपरित घरधनी अर्यालले काम गरेकाले बाध्य भएर तला भत्काउने निर्णय भएको प्रमुख प्रशासकिय अधिकृत किर्तनराज पौडेलले बताए ।
अर्यालले पटक पटक नगरपालिकाको कानुन विपरित काम गर्दा सच्चिने मौका दिएपनि अन्तिम पटक नगरपालिकाले २०७५ कार्तिक १० गते घरधनी अर्याललाई सच्चिने मौका दिएको थियो ।
घरधनी अर्यालले कार्तिक १५ गते नगरपालिकामा पेश गरेको स्पष्टिकरण चित्त बुझ्दो निर्णय नआएकाले जरिवानासहित थपेको तला भत्काउने निर्यण भएको नगरपालिकाले जनाएको छ ।
कार्तिक १६ गते नगरपालिकाको निर्यण अनुसार निज घरधनी अर्याललाई १ हप्ताभित्र आफै घर भत्काउन लगाउने र निजले नियम विपरित काम गरेकोले २ लाख जरिवाना भराउने निर्यण सहित पत्रचार गरेको टिप्पणी आदेशमा उल्लेख गरिएको छ ।
निजले ४ महिना बितिसक्दा समेत नियम विपरित बनाएको तला नभत्काएकोले बाध्य भएर नगर प्रहरी खटाई घरभत्काउन लगाएको नगर प्रमुख अशोक कुमार शाहीले बताए ।
निजले आफै घर भत्काए पनि नियम विपरित काम गरेकोले निजबाट २ लाख जरिवाना लिईने नगरपालिकाले जनाएको छ । घरधनी अर्याललाई नगरपालिकाको निर्यण तथा कामहरु चित्त नबुझेमा अदालतमा जान अनुरोध गरेको छ ।
घरधनी अर्यालले आफ्नो छिमेक तथा वरीपरी सयौ व्यक्तिका मापदण्ड विपरित घरहरु निर्माण भएका छन, उनीहरुको घर नभत्काउने तर मेरो घर विना जानकारी विना सूचना भत्काउने काम गलत भएको बताइन् ।
नगर भित्र मापदण्ड विपरित निर्माण भएका अन्य घरहरु भत्काएमा आफुहरु खुसी भएर घर भत्काउने अर्यालले बताइन् ।
नगरपालिकाका कर्मचारीहरुको मिलेमतोमा कसैलाई आफुखुशी घर बनाए पनि भित्र भित्रै नक्सा पास दिने गरेको, केहीको भने घर नै भत्काईदिने गरेको घरधनी अर्यालले बताइन् ।
नियम विपरित बनेका सबै घर, बाटो भत्काएर देखाउन घरधनी अर्यालले नगर सरकारलाई चेतावनी दिएकी छिन् । आफ्ना नजिकका व्यत्तिहरुले हालसालै बाटो, ढल, मिचेर ३ तले भवन बनाएका छन् ती व्यत्तिहरुलाई कारवाही नहुने, सोझा साझा, विदेशमा पसिना बगाएको रकमले आफ्नै जग्गामा घर बनाउँदा विभिन्न व्यक्तिको प्रभावमा परेर आफ्नो घर भत्काइएको अर्यालले गुनासो गरिन् ।
केही दिनअघि तानसेन नगरपालिका वडा नंं ७ का सुमन परियारको पनि मापदण्ड विपरित घर निर्माण गरेको भन्दै डोजर लगाएर भत्काएको थियो ।
प्रतिकृया दिनुहोस