शनिबार ०८, मङि्सर २०८१ ०७:०५
कामठाडौं, नेपाल हज समितिले हज यात्राका लागि साउदी अरब जाने हजयात्रीको सुविधा विगतको तुलनामा गुणात्मक रुपले बढाउने तयारी भइरहेको जनाएको छ।
समितिले आज पत्रकार सम्मेलन गरी आगामी साउन २ गतेदेखि हज यात्रामा निस्कने हजयात्रीको व्यवस्थापनका लागि आवासीय सुविधा र खानपिनको राम्रो व्यवस्था गरिएको जनाएको हो। यस वर्ष पनि नेपालबाट एक हजार दुई सय जना हज यात्रामा जानेछन्।
हज यात्रामा दुई हजार पठाउनका लागि पहल गरिए पनि सार्थक नभएको समितिले जनाएको छ। गृहमन्त्रालय, परराष्ट्र मन्त्रालय र साउदी अरबस्थित नेपाली दूतावासको अथक प्रयासका बाबजुत पनि कोटा बढाउन नसकिएको समितिका अध्यक्ष शमशेर मियाँले बताए।
साउन २ देखि १० गतेभित्र हजयात्री साउदी पुग्नेछन्। दैनिक एक सय ५० का दरले एयर अरेबियाको जहाजबाट हजयात्री लगिनेछ। साउदीमा ४२ दिनको मुख्य हज यात्रा सकेपछि उनीहरु स्वदेश फर्कने बताइएको छ।
थप एक हजार कोटा माग गरिएकामा साउदी सरकारले पाँच सय थप्ने मौखिक आश्वासन दिएको भए पनि त्यो पूरा हुन नसकेको भन्दै अध्यक्ष मियाँले बताए। उनले हजयात्रीको कोटा बढाउनका लागि पहल गरिदिन सरकारसमक्ष आग्रह गरे।
समितिका अनुसार नेपालमा अहिले झण्डै १५ लाख मुस्लिम छन्। हज यात्राका लागि प्रतिव्यक्ति करीब दुई लाख ३० हजार खर्च लाग्ने बताइन्छ। यो रकम हजीले नै ब्यहोर्छन्।
समितिले १० देखि १५ हजार हरेक हजीलाई फिर्ता गर्ने गरेको थियो। यो वर्ष रकम बढेकाले फर्काउन समस्या हुने समितिको भनाइ छ।
विगतभन्दा कम रकममा हज गराउन लक्ष्यका साथ काम गरिरहेको भए पनि साउदी सरकारले नै हजयात्रीको खर्च बढाएकाले समस्या भएको समितिका अध्यक्ष शमशेर मियाँले बताए। उनले हजयात्रीको सहज व्यवस्थापनका लागि अनुदान रकम उपलब्ध गराउन सरकारसँग माग गरे।
समितिका अनुसार यस वर्ष साउदी रियल बढेकाले प्रतिहाजीको कूल खर्चमा झण्डै पाँच हजारले वृद्धि भएको छ। साउदी सरकारलाई प्रतिहाजी बुझाउनुपर्ने स्थानीय यातायात खर्च यसपटक १५ हजार एक सय ८० ले बुझाउनुपर्ने बाध्यता छ।
प्रतिकृया दिनुहोस