दुई बर्ष देखि तलव भत्ता जेष्ठ नागरिकलाई उपलव्ध गराउदै वडा अध्यक्ष

कञ्चनपुरको भीमदत्त नगरपालिका वडा नं १ का वडा अध्यक्ष आसेफ कुवँरले दुई बर्ष देखि नगरपालिकाका तर्फ बाट उपलव्ध हुने तलव भत्ताको रकम जेष्ठ नागरिक र पूर्ण अपांगता भएका व्यक्तिहरुलाई वितरण गर्दै आएका छन ।
वडा कार्यालय र घरमै पुगेर वडा अध्यक्ष कुवँरले आफुले पाउदै आएको तलव भत्ताको रकम वितरण गर्दै आएका हुन । नगरपालिका बाट प्राप्तहुने तलव भत्ताको रकम आफुले नलिने घोषणा गरेका कुवँरले सो तलव भत्ता जेष्ठनागरिक र पूर्ण अपांगता भएका व्यक्तिहरुलाई वितरण गर्न थालेका छन ।

पाँच बर्षे कार्यकालको तलव भत्ताको पुरै रकम जेष्ठनागरिक र पूर्ण अपांगता भएका व्यक्तिहरुलाई दिने मेरो प्रतिवद्धता हो वडा अध्यक्ष कुवँरले भने, ‘त्यही अनुरुप प्रति बर्ष वितरण गर्दै आएको छु । म नगरपालिकामा जनताको सेवक बनेर आएको हु । सोही अनुरुप सबैको सम्मान हुने गरी कार्य गर्छु ।’ जेष्ठनागरिक र पूर्ण अपांगता भएका व्यक्तिहरुलाई उनले रु एक हजार पाँच सयका दरले रकम वितरण गर्दै आएका छन ।
आइतवार १५० जना जेष्ठनागरिक र पूर्ण अपांगता भएका व्यक्तिहरुलाई भत्ताको रु दुई लाख ६२ हजार रकम वितरण गरिएको छ । स्थानिय तहको निर्वाचनकै बेला कुवँरले नगरपालिका बाट पाउने तलव भत्ताको रकम जेष्ठनागरिक र अपांगता भएका व्यक्तिहरुलाई दिने घोषणा गरेका थिए ।